ପୋଖରୀରୁ ଯୁବକଙ୍କ ଶବ ଉଦ୍ଧାର

ଗୋଷାଣି : ଗଜପତି ଜିଲ୍ଲା ଗୋଷାଣି ବ୍ଲକ ଗୁରାଣ୍ଡି ଥାନା ଅନ୍ତର୍ଗତ ଘୋରଣୀ ଗ୍ରାମରେ ଥିବା ଏକ ପୋଖରୀରୁ ଆଜି ସନ୍ଧ୍ୟା ପାଖାପାଖି ୮ଘଣ୍ଟା ସମୟରେ ଜଣେ ଯୁବକଙ୍କ ମୃତ ଦେହ ଉଦ୍ଧାର କରାଯାଇଥିବାର ଜଣାପଡିଛି । ଗ୍ରାମବାସୀଙ୍କ ସୂତ୍ରରୁ ପ୍ରକାଶ ଯେ, କେଶବ ଦୋରାଙ୍କ ପୁତ୍ର ମୁନା ଦୋରା(୩୫) ଘୋରଣୀ ଗ୍ରାମ ନିକଟରେ ଥିବା ଏକ ପୋଖରୀକୁ ସନ୍ଧ୍ୟା ପ୍ରାୟ ୬ଘଣ୍ଟା ସମୟରେ କଇଁ ଫୁଲ ତୋଳିବାକୁ ଯାଇଥିଲେ । ହେଲେ ଅନ୍ଧାର ହୋଇଯାଇଥିବାରୁ ତାଙ୍କ ଘର ଲୋକେ ପୋଖରୀ ନିକଟକୁ ଯାଇ ଖୋଜାଖୋଜି କରିଥିଲେ । ପାଖା ପାଖି ୮ଘଣ୍ଟା ସମୟରେ ତାଙ୍କ ମୃତ ଦେହ ପୋଖରୀରରୁ ଉଦ୍ଧାର କରିଥିଲେ । ତେବେ ମୃତ୍ୟୁର କାରଣ ସ୍ପଷ୍ଟ ହୋଇ ନଥିବା ବେଳେ ପୋଖରୀରେ ଉଠିଥିବା ଅନାବନା ଲଟାବୁଦା ତଥା ଫୁଲଗଛର ଦଳ ମଧ୍ୟରେ ଗୋଡ ଫସିଯାଇଥିବାରୁ ତାଙ୍କର ମୃତ୍ୟୁ ଘଟିଲା ବୋଲି ଆଲୋଚନା ହେଉଅଛି । ଶବଟିକୁ ଉଦ୍ଧାର କରିବା ପରେ ତୁରନ୍ତ ଗୁରାଣ୍ଡି ଥାନାକୁ ଖବର ଦେଇଥିଲେ । ଘଟଣା ସ୍ଥଳରେ ଗୁରାଣ୍ଡି ଥାନା ପୋଲିସ ପହଞ୍ଚି ଶବକୁ ଜବତ କରିବା ସହ ପାରଳାଖେମୁଣ୍ଡି ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟକୁ ବ୍ୟବଚ୍ଛେଦ ନିମନ୍ତେ ପଠାଇ ଦେଇଥିବାର ଜଣାପଡିଛି । ଏନେଇ ଗୁରାଣ୍ଡି ଥାନାରେ ୩/୨୩ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ତଦନ୍ତ ଜାରି ରହିଥିବାର ଥାନା ସୂତ୍ରରୁ ପ୍ରକାଶ । ଯୁବକ ମୁନା ଦୋରାଙ୍କ ଏପରି ଅକାଳ ବିୟୋଗକୁ ନେଇ ଘୋରଣୀ ଗ୍ରାମାଞ୍ଚଳରେ ଶୋକର ଛାୟା ଖେଳିଯାଇଛି ।