ଏସିଏଫ ସୌମ୍ୟରଞ୍ଜନ ମୃତ୍ୟୁ ମାମଲା

୩ ଅଭିଯୁକ୍ତଙ୍କୁ ହାଇକୋର୍ଟରୁ ମିଳିଲା ଆସ୍ବସ୍ତି

ପାରଳାଖେମୁଣ୍ଡି,୭।୭: ଗଜପତି ଜିଲାର ବହୁ ଚର୍ଚ୍ଚିତ ଏସିଏଫ ସୌମ୍ୟରଞ୍ଜନ ମୃତ୍ୟୁ ମାମଲାରେ ୩ ଅଭିଯୁକ୍ତଙ୍କୁ ହାଇକୋର୍ଟରୁ ଆସ୍ବସ୍ତି ମିଳିଛି । ସେହିକ୍ରମରେ ଆଜି ମୃତ ସୌମ୍ୟରଞ୍ଜଙ୍କ ପତ୍ନୀ ବିଦ୍ୟାଭାରତୀ, ପୂର୍ବତନ ଡିଏଫଓ ସଂଗ୍ରାମ କେଶରୀ ବେହେରା ଏବଂ ରୋଷେୟା ମନ୍ମଥ କୁମ୍ଭଙ୍କୁ ପାରଳାଖେମୁଣ୍ଡି ଏସଡିଜେଏମ କୋର୍ଟରେ ହାଜର ହେବାକୁ ପଡିଲା ନାହିଁ । ବାରମ୍ବାର ନୋଟିସ ସ‌େ‌ତ୍ତ୍ବ  ୩ ଅଭିଯୁକ୍ତ ଏସଡିଜେଏମଙ୍କ କାର୍ଟରେ ବ୍ୟକ୍ତିଗତ ହଜିରା ନହେବାରୁ ଗତ ୨୩ ତାରିଖରେ ଏସଡିଜେଏମ ୩ ଅଭିଯୁକ୍ତଙ୍କ ବିରୋଧରେ ଜାମୀନ ବିହୀନ ଗିରଫ ପରୱାନା ଜାରି କରିଥିବା ବେଳେ ଜୁଲାଇ ୭ ତାରିଖ ସୁଧା ଅଦାଲତରେ ବ୍ୟକ୍ତିଗତ ହାଜର କରାଇବାକୁ ପୁଲିସକୁ ନିର୍ଦେଶ ଦେଇଥିଲେ । ହେଲେ ସିଆରପିସି ଧାରା ୨୦୫ ଅନୁସାରେ  ଅଭିଯୁକ୍ତମାନେ ବ୍ୟକ୍ତିଗତ ହାଜିରା ନହୋଇ ଓକିଲଙ୍କ ଦ୍ବାରା ପକ୍ଷ ରଖିପାରିବେ ବୋଲି ପୂର୍ବରୁ ହାଇକୋର୍ଟ ଅନୁମତି ଦେଇସାରିଛନ୍ତି । ସେହିପରି ଏସଡିଜେଏମଙ୍କ ପକ୍ଷରୁ ଜାରି ଜାମୀନ ବିହୀନ ଗିରଫ ପରୱାନା ନିର୍ଦେଶନାମାରେ ରହିତାଦେଶ ଜାରି କରିବାକୁ ବିଦ୍ୟାଭାରତୀଙ୍କ ପକ୍ଷରୁ ହାଇକୋର୍ଟରେ କରାଯାଇଥିବା ଆବେଦନକୁ ମଧ୍ୟ ହାଇକୋର୍ଟ ଗ୍ରହଣ କରିଛନ୍ତି ବୋଲି ବିଦ୍ୟାଭାରତୀଙ୍କ ଓକିଲ ଏଲକେ ଅଧିକାରୀ କହିଛନ୍ତି । ସୌମ୍ୟରଞ୍ଜନ ମୃତ୍ୟୁ ମାମଲାରେ ୩ ଅଭିଯୁକ୍ତଙ୍କ ନାମରେ ହତ୍ୟା ଓ  ପ୍ରମାଣନଷ୍ଟ ଉଦ୍ୟମ ଦଫାରେ ମାମଲା ରୁଜୁ ହୋଇଥିଲା । ଆଜି ଯାଏଁ ସେମାନେ ନିଜ ଓକିଲଙ୍କ ଜରିଆରେ ହିଁ ଅଦାଲତରେ ପକ୍ଷ ରଖି ଆସୁଛନ୍ତି । ଏହା ବିରୋଧରେ ମୃତ ସୌମ୍ୟରଞ୍ଜନଙ୍କ ବାପା ନିଜ ଓକିଲ ଜରିଆରେ କୋର୍ଟରେ ପିଟିସନ ଦାଖଲ କରିଥିଲେ । ଏହାପରେ ଅଭିଯୁକ୍ତଙ୍କୁ ବ୍ୟକ୍ତିଗତ ହାଜିରା ହେବାକୁ ପାରଳାଖେମୁଣ୍ଡି ଏସଡିଜେଏମ ଅଦାଲତ ନୋଟିସ ଜାରି କରିଥିଲେ । ହେଲେ ବାରମ୍ବାର ନୋଟିସ ପରେ ଅଭିଯୁକ୍ତମାନେ କୋର୍ଟରେ ହାଜର ନହେବାରୁ ଅଦାଲତ ସମସ୍ତ ଅଭିଯୁକ୍ତଙ୍କ ବିରୋଧରେ ଜାମୀନ ବିହୀନ ଗିରଫ ପରୱାନା ଜାରି କରିଥିଲେ । ଏହା ଭିତରେ ହାଇକୋର୍ଟ ଅଭିଯୁକ୍ତଙ୍କୁ ବ୍ୟକ୍ତିଗତ ହାଜିରା ନହୋଇ ଓକିଲଙ୍କ ଦ୍ବାରା ପକ୍ଷ ରଖିପାରିବେ ବୋଲି ଅନୁମତି ଦେଇସାରିଥିଲେ ।  ସେହିକ୍ରମରେ ଜାମୀନ ବିହୀନ ଗିରଫ ପରୱାନା ପ୍ରତ୍ୟାହାର କରିନେବାକୁ ଆଜି ବିଦ୍ୟାଭରତୀଙ୍କ ଓକିଲ ଏଲକେ ଅଧିକାରୀ ପାରଳାଖେମୁଣ୍ଡି ଏସଡିଜେଏମଙ୍କୁ ଅନୁରୋଧ କରିଥିଲେ ।  ଏହାପରେ ମୃତ ସୌମ୍ୟରଞ୍ଜନଙ୍କ ବାପା ଓ ତାଙ୍କ ଓକିଲଙ୍କ ପରବର୍ତ୍ତୀ ପଦକ୍ଷେପ କଣ ରହୁଛି ତାହା ଉପରେ ସମସ୍ତଙ୍କ ନଜର କେନ୍ଦ୍ରୀଭୂତ ହୋଇଛି ।