ନବୋଦୟ ଛାତ୍ରୀ ମୃତ୍ୟୁ ମାମଲା, ଗଜପତିରେ କ୍ରାଇମବ୍ରାଞ୍ଚର ଦ୍ବିତୀୟ ପର୍ଯ୍ୟାୟ ତଦନ୍ତ
ପାରଳାଖେମୁଣ୍ଡି,୭।୭ : ପାରଳାଖେମୁଣ୍ଡି ସ୍ଥିତ ଜବହାର ନବୋଦୟ ବିଦ୍ୟାଳୟର ନବମ ଶ୍ରେଣୀ ଛାତ୍ରୀ ସୌଦାମିନୀ ରଇତଙ୍କ ମୃତ୍ୟୁ ମାମଲାର ତଦନ୍ତ ଭାର କ୍ରାଇମବ୍ରଞ୍ଚ ନେଇଛି । ଗତମାସରେ କ୍ରାଇମବ୍ରାଞ୍ଚ ଟିମ ଗଜପତି ଜିଲାକୁ ଆସି ବିଭିନ୍ନ ଦିଗରୁ ତଦନ୍ତ କରି ତଥ୍ୟ ପ୍ରମାଣ ସଂଗ୍ରହ କରି ଫେରିଥିଲା । ଆଜି ପୁଣି ୪ ଜଣିଆ କ୍ରାଇମବ୍ରାଞ୍ଚ ଦଳ ପାରଳାଖେମୁଣ୍ଡିରେ ପହଞ୍ଚି ଦ୍ବିତୀୟ ପର୍ଯ୍ୟାୟ ତଦନ୍ତ ଆରମ୍ଭ କରିଛନ୍ତି । ଆଜି କ୍ରାଇମବ୍ରାଞ୍ଚ ଜବାହାର ନବୋଦୟ ବିଦ୍ୟାଳୟରେ ପହଞ୍ଚି ସୌଦାମିନୀ ସହପାଠୀ, ଶିକ୍ଷକ, ଶିକ୍ଷୟତ୍ରୀଙ୍କୁ ପଚରାଉଚରା କରିଥିବା ଜଣାପଡ଼ିଛି । ପ୍ରକାଶଥାଉକି, ଗତ ଫେବୃଆରୀ ମାସରେ ସୌଦାମିନୀଙ୍କ ଝୁଲନ୍ତା ମୃତଦେହ ବେିଦ୍ୟାଳୟ ପରିସରରେ ଥିବା ହଷ୍ଟେଲ କୋଠାରୁ ମିଳିଥିଲା । ଏହି ଘଟଣା ଜିଲାରେ ବେଶ ଚର୍ଚ୍ଚାର ବିଷୟ ପାଲଟିଥିଲା । ସୌଦାମିନୀଙ୍କୁ ହତ୍ୟା କରାଯାଇଛି ବୋଲି ତାଙ୍କ ପରିବାର ଲୋକେ ଅଭିଯୋଗ କରିବା ସହ କ୍ରାଇମବ୍ରାଞ୍ଚ ତଦନ୍ତ ଦାବିରେ ଦୀର୍ଘ ୪୬ ଦିନ ଧରି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ ।
