ପାରଳାରେ ଦେବସ୍ନାନ ପୁର୍ଣମା ଅନୁଷ୍ଠିତ

ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ଠାରେ ଥିବା ଶ୍ରୀଜଗନ୍ନାଥ ମନ୍ଦିରରେ ଅତ୍ୟନ୍ତ ଭକ୍ତିପୂତ ଭାବେ ରବିବାର ଦିନ ୩ ଠାକୁରଙ୍କ ଦେବସ୍ନାନ ପୂର୍ଣ୍ଣିମା ଅନୁଷ୍ଠିତ ହୋଇଯାଇଛି ।  ପ୍ରତେକ ଦିନ ଭଳି ଆଜି ଭୋରରେ ୩ ଠାକୁରଙ୍କ ପୂଜା ଵିଧି ଓ ଆଳତି ସମ୍ପୂର୍ଣ ହୋଇଥିଲା । ପରେ ସକାଳ ୧୦ ଘଣ୍ଟା ସମୟରେ ତିନି ଠାକୁରଙ୍କୁ  ସ୍ନାନ ମଣ୍ଡପକୁ ନିଆ ଯାଇଥିଲା । ସ୍ନାନ ମଣ୍ଡପରେ ୩ ଠାକୁରଙ୍କୁ ୧୦୮ କଳସୀ ଜଳ ଦ୍ୱାରା ପ୍ରଥମେ  ସ୍ନାନ କରାଯିବା ପରେ ୧୦୮ ପଇଡ଼ ଦ୍ୱାରା ପୁଣି ସ୍ନାନ କରାଯାଇଥିଲା ।  ଏହା ପରେ ଗଙ୍ଗା ଜଳରେ ସ୍ନାନ କରାଯାଇ ୩ ଦିଅଁଙ୍କୁ ଚନ୍ଦନ ଲାଗି କରାଯାଇଥିଲା । ଅପରାହ୍ନରେ ୩ ଠାକୁର ସ୍ନାନ ମଣ୍ଡପରେ ଭକ୍ତଙ୍କୁ ଦର୍ଶନ ଦେଇଥିଲେ । ଶ୍ରୀଜଗନ୍ନାଥଙ୍କୁ ଆଜି ସ୍ନାନ ମଣ୍ଡପରେ ଗଜାନନଙ୍କ ଅବତାରରେ ସୁସଜିତ କରାଯାଇ ଭକ୍ତଙ୍କ ଉଦେଶ୍ୟରେ ଦର୍ଶନ ପାଇଁ ବ୍ୟବସ୍ଥା ହୋଇଥିଲା । ଏହାପରେ ଅଣସର ନୀତି କରାଯାଇଥିଲା । ସ୍ନାନ ପରେ ଜ୍ଵରରେ ପଡିବେ ମହାପ୍ରଭୁ । ଏହାପରେ ଉପଶମ ପାଇଁ ଚାଲିବ ଉପଚାର । ମହାପ୍ରଭୁ ସୁସ୍ଥ ହୋଇ ଆସନ୍ତା ୧୯ ତାରିଖରେ ନବଯୌବନ ବେଶରେ ଭକ୍ତଙ୍କୁ ଦର୍ଶନ ଦେବେ । ଜୁନ ୨୦ ତାରିଖରେ ରଥରେ ବସି ଯିବେ ଜନ୍ମ ବେଦୀକୁ ।    ପ୍ରକାଶ ଯେ, ପାରଳାଖେମୁଣ୍ଡି ଜଗନ୍ନାଥ ମନ୍ଦିର ଅତି ପ୍ରାଚୀନ ମନ୍ଦିର ଅଟେ । ଏଥିସହ ପାରଳାଖେମୁଣ୍ଡି ରଥଯାତ୍ରା ଦକ୍ଷିଣ ଓଡିଶାରେ ଏବଂ ଆନ୍ଧ୍ର ଓଡିଶା ସୀମାନ୍ତ ଅଞ୍ଚଳରେ ବେଶ ପ୍ରଖ୍ୟାତ ଓ ଲୋକପ୍ରିୟତା ରହି ଆସିଛି । ଦେବ  ସ୍ନାନ ପୂର୍ଣ୍ଣିମା ରଥଯାତ୍ରା ଆରମ୍ଭର ପ୍ରଥମ ପର୍ବ ଅଟେ । ତେଣୁ ଆଜିର ଦେବ ସ୍ନାନ ପୂର୍ଣ୍ଣିମାରେ ୩ ଦିଅଁଙ୍କ ଦର୍ଶନ ପାଇଁ ପଡୋଶୀ ଆନ୍ଧ୍ର ସମେତ ଦକ୍ଷିଣ ଓଡିଶାରୁ ହଜାର ହଜାର ଭକ୍ତ ଓ ଶ୍ରଦ୍ଧାଳୁ ସମାଗମ ହୋଇଥିବା ଲକ୍ଷ୍ୟ କରାଯାଇଛି ।