ଆହୁରି ଦୁଇ ଦିନ ଜାଳିବ ତାତି, ସ୍ୱାଭାବିକଠୁ ୫-୭ଡିଗ୍ରୀ ଉପରେ ରହିବ ପାରଦ : ୭ ଜିଲ୍ଲା ପାଇଁ ଅରେଞ୍ଜ ୱାର୍ଣ୍ଣିଂ ଜାରି
ଆହୁରି ଦୁଇ ଦିନ ଜାଳିବ ତାତି, ସ୍ୱାଭାବିକଠୁ ୫-୭ଡିଗ୍ରୀ ଉପରେ ରହିବ ପାରଦ: ୭ ଜିଲ୍ଲା ପାଇଁ ଅରେଞ୍ଜ ୱାର୍ଣ୍ଣିଂ ଜାରି……
ଭୁବନେଶ୍ୱର : ଆଗକୁ ଦୁଇ ଦିନ ଏଭଳି ପ୍ରଚଣ୍ଡ ତାତି ସମସ୍ତଙ୍କୁ କଲବଲ କରିବ । ଭୟଙ୍କର ଗ୍ରୀଷ୍ମ ଲହରୀ ବହିବ ।ଏଭଳି ଭୟଙ୍କର ତାତିକୁ ଆଖିରେ ରଖି ପାଣିପାଗ ବିଭାଗ ଓ ସ୍ୱତନ୍ତ୍ର ରିଲିଫ କମିଶନର (ଏସ୍ଆରସି) ଚିନ୍ତାପ୍ରକଟ କରିଛନ୍ତି । ଆବଶ୍ୟକ ନ ଥିଲେ ୧୧ଟାରୁ ୩ଟା ଯାଏ ବାହାରକୁ ନ ବାହାରିବାକୁ ସତର୍କ କରାଇଛନ୍ତି ପାଣିପାଗ ବିଶେଷଜ୍ଞ । ସୋମବାର ଓ ମଙ୍ଗଳବାର ଦୁଇ ଦିନ ପଶ୍ଚିମ ଓଡ଼ିଶାର ୭ ଜିଲ୍ଲା ପାଇଁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି । ଅନ୍ୟ ଜିଲ୍ଲା ପାଇଁ ମଧ୍ୟ ଆଶ୍ୱସ୍ତି ନାହିଁ । ଆକାଶରୁ ନିଆଁ ବର୍ଷିବ ଓ ତତଲା ପବନ ମାଡ଼ରେ ସମସ୍ତେ କଲବଲ ହେବେ ବୋଲି ଆକଳନ ଦିଆଯାଇଛି । ୧୯ ଯାଏ ତାତିରୁ ତ୍ରାହି ନାହିଁ ବୋଲି ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି । ସୋମବାର ଝାରସୁଗୁଡ଼ା, ସମ୍ବଲପୁର, ବରଗଡ଼, ସୋନପୁର, ବୌଦ୍ଧ, ବଲାଙ୍ଗୀର ଓ କେନ୍ଦୁଝରରେ ଭୀଷଣ ଗ୍ରୀଷ୍ମଲହରୀ ଆଶଙ୍କା ପାଇଁ ଅରେଞ୍ଜ ୱାର୍ଣ୍ଣିଂ ଜାରି କରିଛନ୍ତି ସ୍ୱତନ୍ତ୍ର ରିଲିଫ କମିଶନର(ଏସ୍ଆରସି) । ତାତିକୁ ମୁକାବିଲା କରିବାକୁ ପ୍ରସ୍ତୁତ ରହିବାକୁ ସବୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ସୁନ୍ଦରଗଡ଼, ନୂଆପଡ଼ା, କନ୍ଧମାଳ, ମୟୂରଭଞ୍ଜ ପାଇଁ ୟେଲୋ ସତର୍କତା ଦିଆଯାଇଛି । ମଙ୍ଗଳବାର ଝାରସୁଗୁଡ଼ା, ସମ୍ବଲପୁର, ବରଗଡ଼, ସୋନପୁର ଓ ବୌଦ୍ଧ ପାଇଁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି । ସେହିଭଳି ବଲାଙ୍ଗୀର, କେନ୍ଦୁଝର, କନ୍ଧମାଳ, ସୁନ୍ଦରଗଡ଼ ଓ କଳାହାଣ୍ଡି ପାଇଁ ଏସ୍ଆରସି ୟେଲୋ ସତର୍କତା ଦେଇଛନ୍ତି । ଫୁଲବାଣୀରେ ରବିବାର ତାପମାତ୍ରା ସ୍ୱାଭାବିକଠାରୁ ୭.୮ ଡିଗ୍ରୀ ଅଧିକ ବଢ଼ି ଯାଇଥିଲା । ବଲାଙ୍ଗୀରରେ ସ୍ୱାଭାବିକଠାରୁ ୭.୧, କେନ୍ଦୁଝରରେ ୬.୭, ଭୁବନେଶ୍ୱରରେ ୬.୬ ଅଧିକ ତାତି ରହିଥିଲା । ୪ଟି ସହର ୪୪ ଡିଗ୍ରୀ ଉପରେ ଥିଲା । ପ୍ରଚଣ୍ଡ ତାତି ଓ ଗ୍ରୀଷ୍ମଲହରୀର ଏହି ଧାରା ଭାଙ୍ଗିବାର କ୍ୱଚିତ୍ ଆଶା ନାହିଁ । ଆସନ୍ତା ଦୁଇ ଦିନ ରାଜ୍ୟରେ ଭୀଷଣ(ସିଭିୟର) ହିଟ୍ ୱେଭ୍ ବା ଗ୍ରୀଷ୍ମଲହରୀ ବହିବ ବୋଲି ପାଣିପାଗ ବିଭାଗ ସତର୍କ କରାଇଛି । ଉପକୂଳରୁ ନେଇ ଉତ୍ତର ଓଡ଼ିଶା । ପଶ୍ଚିମରୁ ଦକ୍ଷିଣ । ସବୁଠି ହୁତହୁତ୍ ହୋଇ ଜଳୁଥିଲା । ୩୦ ସହର ୪୦ ଡିଗ୍ରୀ ଉପରେ ପହଞ୍ଚିଥିଲା । ଲାଗୁଥିଲା, ଯେମିତି ଆକାଶରୁ ନିଆଁ ବର୍ଷୁଛି । ପଦାକୁ ଗଲେ ମୁହଁ, ହାତ ପୋଡ଼ି ପକାଉଥିଲା । ଝାଞ୍ଜି ମାଡ଼ ଏତେ ଭୀଷଣ ଥିଲା ଯେ ଲୋକେ ତ୍ରାହି ତ୍ରାହି ଡାକୁଥିଲେ । ଆହୁରି ଦୁଇ ଦିନ ଏଭଳି ଭୟଙ୍କର ସ୍ଥିତି ଲାଗି ରହିବ । ରବିବାର ବଲାଙ୍ଗୀର ଓ ବରଗଡ଼ ସବୁଠୁ ଉତ୍ତପ୍ତ ସହର ପାଲଟିଥିଲା । ଦୁଇ ସହର ୪୪.୫ ଡିଗ୍ରୀ ତାତିରେ ଭାଜି ହୋଇଥିଲା । ଏହା ତଳକୁ ଥିଲା ଝାରସୁଗୁଡ଼ା । ଏଠାରେ ତାପମାତ୍ରା ୪୪.୪ ଓ ସୋନପୁରରେ ୪୪.୩ ଡିଗ୍ରୀ ଥିଲା । ପଶ୍ଚିମ ଓଡ଼ିଶା ଏଭଳି ପ୍ରଚଣ୍ଡ ତାତିରେ ଜଳୁଥିଲା । ଏପଟେ ଉପକୂଳ ବି ବାଦ୍ ପଡ଼ିନଥିଲା । ଭୁବନେଶ୍ୱରରେ ୪୨.୬, କଟକରେ ୪୧.୬ ଓ କେନ୍ଦ୍ରାପଡ଼ାରେ ୪୧ଡିଗ୍ରୀ ତାତିରେ ଜଳୁଥିଲା । ଅନେକ ସ୍ଥାନରେ ସକାଳ ଓ ସନ୍ଧ୍ୟାରେ ପ୍ରକୃତ ଅନୁଭବ ତାପମାତ୍ରା(ରିଅଲ ଫିଲ୍ ଟେମ୍ପ୍ରେଚର) ୫୦ଡିଗ୍ରୀ ଥିଲା । ପଶ୍ଚିମ ଓ ଉପକୂଳ ଭଳି ଉତ୍ତର ଓ ଦକ୍ଷିଣ ଓଡ଼ିଶାବାସୀ ବି ଭୀଷଣ ତାତି ଓ ଗୁଳୁଗୁଳିରେ ସନ୍ତୁଳି ହୋଇଥିଲେ । ବାରିପଦାରେ ୪୧,୬, କେନ୍ଦୁଝରରେ ୪୧ ଡିଗ୍ରୀ ରେକର୍ଡ ହୋଇଥିଲା । ସେହିଭଳି ବ୍ରହ୍ମପୁରରେ ୪୨.୫, ପାରଳାଖେମୁଣ୍ଡିରେ ୪୨, ମାଲକାନଗିରିରେ ୪୦.୫ ଡିଗ୍ରୀ ତାତି ଲୋକଙ୍କୁ ଛଟପଟ କରିଥିଲା । ଆସନ୍ତା ୧୯ ତାରିଖ ଯାଏ ରାଜ୍ୟରେ ଗରମ ଜାରି ରହିବ ବୋଲି ବରିଷ୍ଠ ପାଣିପାଗ ବିଶେଷଜ୍ଞ ପ୍ରଫେସର ଡ. ସୁରେନ୍ଦ୍ରନାଥ ପଶୁପାଳକ କହିଛନ୍ତି । ଆସନ୍ତା ସପ୍ତାହରେ ଗ୍ରୀଷ୍ମଲହରୀ ବଢ଼ିବ । ୨୦ ତାରିଖ ଆଗରୁ ମୌସୁମୀ ଆସିବାର ସଙ୍କେତ ମିଳୁନି ବୋଲି ସେ ଆକଳନ କରିଛନ୍ତି । ଭୁବନେଶ୍ୱର ସମେତ ଅନ୍ୟ ସ୍ଥାନର ତାପମାତ୍ରା ଆହୁରି ବଢ଼ିବ । ସୋମବାର ରାଜଧାନୀ ତାତି ୧.୫ ଡିଗ୍ରୀରୁ ଅଧିକ ବଢ଼ିପାରେ । ଦକ୍ଷିଣ ଆଭ୍ୟନ୍ତରୀଣ ଓ ପଶ୍ଚିମ ଓଡ଼ିଶାର କିଛି ସ୍ଥାନରେ ତାତି ୪୬ ଡିଗ୍ରୀ ଟପିଯିବ ବୋଲି ସେ ସତର୍କ କରାଇଛନ୍ତି । ଅଧିକ ଆର୍ଦ୍ରତା ଯୋଗୁ ଉପକୂଳରେ ଗୁଳୁଗୁଳି ବଢ଼ିବ । ଝାଞ୍ଜି ପବନ ବହିବା ଯୋଗୁ ଗରମ ଅସହ୍ୟ ହେବ । ୧୭ ପରେ ସାମାନ୍ୟ ବର୍ଷା ଯୋଗୁ ଉପକୂଳରେ ତାତି ବଢ଼ିପାରେ । ଆଭ୍ୟନ୍ତରୀଣ ଓଡ଼ିଶାରେ ୨୦ ଯାଏ ତାତି ରହିବ । ପ୍ରାକ୍ ମୌସୁମୀ ବର୍ଷା ପରେ ତାତି କମିବ । ୧୮ରୁ ୨୦ ଭିତରେ ରାଜ୍ୟରେ ସ୍ୱଳ୍ପ ମୌସୁମୀ ବର୍ଷା ହୋଇପାରେ । ଗୁଣ୍ଡିଚାରେ ଉପକୂଳରେ ବର୍ଷା ସମ୍ଭାବନା ଅଛି ବୋଲି ଡ. ପଶୁପାଳକ କହିଛନ୍ତି । ଚାଷୀଙ୍କୁ ପରାମର୍ଶ ଦେଇ ସେ କହିଛନ୍ତି, ବିଳମ୍ବିତ ମୌସୁମୀ ସହ ଏଲ୍ ନିନୋର ସମ୍ଭାବ୍ୟ ପ୍ରଭାବ ଯୋଗୁ ଢିପ ଜମିରେ ଅଣଧାନ ଫସଲ କରନ୍ତୁ । ମଧ୍ୟମ ଓ ଖାଲ ଜମିରେ ୧୧୦ରୁ ୧୩୦ ଦିନିଆ ଧାନ ଫସଲ ବ୍ୟବହାର କରନ୍ତୁ । ରୋଇବା ବଦଳରେ ଧାଡ଼ି ରୁଆ ଧାନ କରନ୍ତୁ । ମୌସୁମୀ ବର୍ଷା ଆରମ୍ଭ ପରେ କପା ଓ ଚିନାବାଦାମ ଲଗାନ୍ତୁ । ଜୁଲାଇ ୧୫ ପୂର୍ବରୁ ଏହି କାମ ସାରିବାକୁ ସେ ପରାମର୍ଶ ଦେଇଛନ୍ତି ।
