ରାଜତାରା କଲେଜକୁ +୩ ଖୋଲିବା ପାଇଁ ଅନୁମତି ମିଳିଲା

ପାରଳାଖେମୁଣ୍ଡି : ଗଜପତି ଜିଲ୍ଲା କାଶୀନଗର ବ୍ଲକ ଅନ୍ତର୍ଗତ ସିଧାମଡଙ୍ଗ ଗ୍ରାମରେ ଥିବା ରାଜତାରା ଉଚ୍ଚ ମାଧ୍ୟମିକ ବିଦ୍ୟାଳୟକୁ +୩ ଖୋଲିବାପାଇଁ ଅନୁମତି ମିଳିଥିବାର ଜଣାପଡିଛି । ଓଡିଶା ସରକାରଙ୍କ ଚିଠି ସଂଖ୍ୟା ୧୨୦୪ ପ୍ରକାରେ ୨୦୨୩-୨୪ ଶିକ୍ଷା ବର୍ଷରେ +୩ କଳା ବିଭାଗ ଖୋଲିବାପାଇଁ ସମ୍ମତି ଦେଇଛନ୍ତି । ମୋଟ ୧୨୮ଜଣ ଛାତ୍ରଛାତ୍ରୀଙ୍କ ପାଇଁ ଅନୁମତି ମିଳିଛି । ପ୍ରକାଶ ଯୋଗ୍ୟ ଯେ, ଉଲ୍ଲେଖିତ ଉଚ୍ଚ ବିଦ୍ୟାଳୟ ଗତ ୨୦୧୪ମସିହାରେ ସ୍ଥାପିତ ହୋଇଥିଲା । ଏହି ଅଞ୍ଚଳଟି ପଛୁଆ ବର୍ଗ, ଆଦିବାସୀ, ହରିଜନ ସମେତ ଅନଗ୍ରସର ପରିବାର ତଥା ଦିନ ମଜୁରିଆଙ୍କ ଅଞ୍ଚଳ ହୋଇଥିବାରୁ ଏହି ଅଞ୍ଚଳର ଗରୀବ ଶ୍ରେଣୀରେ ପାଠପଢୁଆ ପିଲାଙ୍କ ଲାଗି ବହୁ ଉପକୃତ ହୋଇପାରିବ । +୩ ମହାବିଦ୍ୟାଳୟ ଖୋଲିବାପାଇଁ ସରକାରଙ୍କ ପକ୍ଷରୁ ଅନୁମତି ଦିଆଯାଇଥିବାକୁ ନେଇ ଅଞ୍ଚଳରେ ଖୁସିର ଲହରୀ ଖେଳିଯାଇଛି । ଏନେଇ ଅଞ୍ଚଳବାସୀଙ୍କ ସମେତ କଲେଜର ସମ୍ପାଦକ କେ.ଅରୁଲ କୁମାର ରାଜ୍ୟ ସରକାରଙ୍କୁ ଧନ୍ୟବାଦ ଦେଇଛନ୍ତି । ଉକ୍ତ କଲେଜ ଖୋଲିବା ଫଳରେ ଏହି ଅଞ୍ଚଳର ଯୁବଗୋଷ୍ଠୀ ଯଥେଷ୍ଟ ଶିକ୍ଷାକ୍ଷେତ୍ରରେ ଅଗ୍ରଗତି ହୋଇପାରିବେ ବୋଲି ବୁଦ୍ଧିଜୀବୀମାନେ ଆଶା ପ୍ରକଟ କରିଛନ୍ତି ।