ସର୍ପ ଦଂଶନରେ ଜଣେ ମୃତ
ଗଜପତି ଜିଲ୍ଲା ଆର.ଉଦୟଗିରି ବ୍ଲକ ରାମଗିରି ଥାନା ଅନ୍ତର୍ଗତ ସୁବଲଡା ଗ୍ରାମପଞ୍ଚାୟତ ସ୍ଥିତ ବେଡିଙ୍ଗି ଗ୍ରାମର ବାୟାଧର ବଡ଼ମୁଣ୍ଡିଙ୍କୁ ସର୍ପ ଦଂଶନରେ ମୃତ୍ୟୁ ଘଟିଥିବାର ଜଣାପଡିଛି। ଘଟଣାରୁ ପ୍ରକାଶ ଯେ, ଗତକାଲି ସନ୍ଧ୍ୟା ସମୟ ରେ ମୃତକ ବୟାଧର ନିଜ ବାରିପଟ କାଠ ସଂଗ୍ରହ କରିବାକୁ ଯାଇଥିଲେ । ସେହିସମୟରେ ସର୍ପଟି ତାଙ୍କ ବାମ ଗୋଡ କୁ କାମୁଡ଼ିଦେଇଥିଲା । ସର୍ପ କାମୁଡିଦେଇ ସେଠାରୁ ଚାଲିଯିବା ଦେଖି ସାହସ କରି ସେ ନିଜେ ସେହି ସର୍ପକୁ ବାଡେଇ ମାରିଦେଇଥିଲେ । ଏହା ପରେ ସର୍ପ ଦଂଶନର ଯନ୍ତ୍ରଣା ସହିନପାରି ଚିତ୍କାର କରିଥିଲେ । ପରିବାର ଲୋକେ ଏହା ଜାଣିବା ପରେ ପ୍ରଥମେ ତାଙ୍କୁ ରାମଗିରି ପ୍ରାଥମିକ ସ୍ଵାସ୍ଥ୍ୟ କେନ୍ଦ୍ରରେ ପ୍ରାଥମିକ ଚିକିତ୍ସା କରି ଚନ୍ଦ୍ରଗିରି ସ୍ଵାସ୍ଥ୍ୟ କେନ୍ଦ୍ରକୁ ନେଇଥିଲେ । ଚନ୍ଦ୍ରଗିରି ଠାରେ ତାଙ୍କ ଚିକିତ୍ସା ସମ୍ଭବ ପର ନହେବାରୁ ତାଙ୍କୁ ଉନ୍ନତ ଚିକିତ୍ସା ଲାଗି ବ୍ରହ୍ମପୁର ଏମକେସିଜି ମେଡିକାଲକୁ ପଠାଇଥିଲେ । ବ୍ରହ୍ମପୁର ସ୍ଥାନାନ୍ତର ବେଳେ ବାୟାଧରଙ୍କ ରାସ୍ତାରେ ମୃତ୍ୟୁ ଘଟିଥିଲା । ପୁଣି ତାଙ୍କ ସମ୍ପର୍କୀୟ ତାଙ୍କୁ ନେଇ ଚନ୍ଦ୍ରଗିରି ସ୍ଵାସ୍ଥ୍ୟ କେନ୍ଦ୍ରକୁ ଫେରିଥିଲେ । ସେଠାରେ ତାଙ୍କୁ ଡାକ୍ତର ସାଗର ମୃତ ଘୋଷଣା କରିଥିଲେ । ଖବର ପାଇ ଚନ୍ଦ୍ରଗିରି ଫାଣ୍ଡି ଅଧିକାରୀ ପ୍ରମୁଖ ପହଞ୍ଚି ଶବ କୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇ ଦେବାର ବ୍ୟବସ୍ଥା କରିଥିଲେ ।
