ଆରିବା ଗ୍ରାମରେ ବଜ୍ରପାତ, ଜଣେ ମୃତ ।

ଗୋଷାଣି, ୨୮।୫ :  ଗଜପତି ଜିଲ୍ଲା ଗୋଷାଣି ବ୍ଲକ କଣ୍ଟ୍ରାଗଡ ପଞ୍ଚାୟତ ଅନ୍ତର୍ଗତ ଆରିବା ଗ୍ରାମ ଠାରେ ଆଜି ଅପରାହ୍ନ ପ୍ରାୟ ୪.୩୦ ସମୟରେ ହୋଇଥବା କାଳ ବୈଶାଖୀ ବର୍ଷାରେ ବଜ୍ରପାତ ଘଟି ଜଣକର ମୃତ୍ୟୁ ହୋଇଥିବା ଜଣାପଡିଛି  । ମୃତକ ଜଣକ ଆରିବା ଗ୍ରାମର ବି.ପାପାରାଓ (୫୫) ବୋଲି ଜଣାପଡିଛି । ସେ ନିଜ ଚାଷ ଜମିକୁ ପାଳ ସଂଗ୍ରହ କରିବା ପାଇଁ ଯାଇଥିବା ସମୟରେ ହଠାତ ମାଡି ଆସିଥିବା କାଳବୈଶାଖୀ ପ୍ରଭାବରେ ବଜ୍ରପାତ ଘଟିଥିଲା । ଫଳରେ ଘଟଣାସ୍ଥଳରେ ହିଁ ସେ ମୃତ୍ୟୁବରଣ କରିଥିଲେ । ଉକ୍ତ ଖବର ଗ୍ରାମରେ ପ୍ରଚାରିତ ହେବା ପରେ ଶୋକାକୁଳ ପରିବେଶ ସୃଷ୍ଟି ହୋଇଛି । ମୃତକ ପାପାରାଓ ଜଣେ ଗରୀବ ଶ୍ରେଣୀର କୃଷକ ଅଟନ୍ତି । କୃଷିରେ ଯାହା ଉପାର୍ଜନ କରୁଥିଲେ ସେ ବର୍ଷ ତମାମ ଗୁଜାରଣ ମେଣ୍ଟାଉଥିଲେ ବୋଲି ଗ୍ରାମବାସୀ ପ୍ରକାଶ କରିଛନ୍ତି । ତେଣୁ ତାଙ୍କୁ ସରକାରୀ ସହାୟତା ପ୍ରଦାନ କରାଗଲେ ମୃତକଙ୍କ ପରିବାର ଉପକୃତ ହୋଇପାରିବେ ବୋଲି ସ୍ଥାନୀୟ ସରପଞ୍ଚଙ୍କ ସମେତ ଗ୍ରାମବାସୀ ନିବେଦନ କରିଛନ୍ତି ।