ସଡକ ଦୁର୍ଘଟଣାରେ ଇଲେକ୍ଟ୍ରିକାଲ ସୁପରଭାଇଜରଙ୍କ ମୃତ୍ୟୁ

କାଶୀନଗର, ୮।୬ :  ଗଜପତି ଜିଲ୍ଲା କାଶୀନଗର ଥାନା ଅନ୍ତର୍ଗତ କଣ୍ଡୁରୁ ଗ୍ରାମ ନିକଟସ୍ଥ ରାଜ୍ୟ ମୁଖ୍ୟ ରାସ୍ତାରେ ସଡକ ଦୁର୍ଘଟଣାରେ ଇଲେକ୍ଟ୍ରିକାଲ ସୁପରଭାଇଜରଙ୍କ ଅଭିଷେକ ପଟ୍ଟନାୟକ (୨୪)ଙ୍କ ମୃତ୍ୟୁ ହୋଇଥିବା ଜଣାପଡିଛି । ମୃତ୍ୟୁ ବ୍ୟକ୍ତିଙ୍କ ଘର ରାଉଲକେଲା ହୋଇଥିବା ବେଳେ ସେ ଓମକର ଏଜେନ୍ସି ତରଫରୁ ୩୩/୧୧କେଭି ଷ୍ଟ୍ରକଚର୍ ସୁରକ୍ଷା ତାଲିମ ସୂପରଭାଇଯାର ଦାୟିତ୍ୱରେ କାର୍ଯ୍ୟରତ ଥିଲେ । ସେ ପାରଳାଖେମୁଣ୍ଡିରେ ରହି କାଶୀନଗର ସବ୍-ଡିଭିଜନରେ ଥିବା ଇଲେକ୍ଟ୍ରିକାଲ କର୍ମଚାରୀଙ୍କୁ ସୁରକ୍ଷା ତାଲିମ  ପାଇଁ ଗୁରୁବାର ଦିନ କାଶୀନଗର ଆସିଥିଲେ । ତାଲିମ କାର୍ଯ୍ୟକ୍ରମ ଶେଷ କରି ନିଜ ବାଇକ ଯୋଗେ ପାରଳାଖେମୁଣ୍ଡି ଫେରୁଥିବା ବେଳେ ଏକ ଅଟୋରିକ୍ସା ସହ ଧକ୍କା ହୋଇଥିଲା । ପରେ ଉକ୍ତ ଦୁର୍ଘଟଣା ସ୍ଥଳରୁ ଅଭିଷେକଙ୍କୁ ଉକ୍ତ ଅଟୋରେ ହିଁ ସଙ୍ଗେ ସଙ୍ଗେ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟକୁ ନେଇଥିବା ବେଳେ ସେଠାରେ ତାଙ୍କ ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ । କାଶୀନଗର ଥାନା ପୋଲିସ ଘଟଣା ସ୍ଥଳରେ ପହଞ୍ଚି  ତଦନ୍ତ ଜାରି କରିଥିବା ଜଣାପଡିଛି । ଅଭିଷେକଙ୍କ ମୃତ୍ୟୁକୁ ନେଇ ବିଦ୍ୟୁତ ବିଭାଗରେ ଶୋକର ଛାୟା ଖେଳିଯାଇଛି ।